काठमाडौँ । दसैँ अगाडि राष्ट्रिय स्वतन्त्र पार्टी(रास्वपा) को मधेस प्रदेश अधिवेशन नहुने भएको छ । निर्वाचित सांसदहरूको दबाब र जातीय विवादका कारण स्थगित भएको अधिवेशन महाधिवेशन महाधिवेशन सम्पन्न भएको दुई महिना पुगिसक्दा पनि केन्द्रीय निर्वाचन आयोगले तयारी थालेको छैन ।
आयोगले जेठ २६ गते एक सूचना जारी गर्दै अधिवेशनको निष्पक्ष, पारदर्शी, विश्वसनीय तथा विधिसम्मत सञ्चालन सुनिश्चित गर्न आवश्यक देखिएकाले मधेस अधिवेशनको सम्पूर्ण गतिविधि स्थगित गरिएको जानकारी दिएको थियो । पार्टीका दुई पक्षबिच विवाद बढ्दै जाँदा स्थिति काबु बाहिर पुग्ने देखिएपछि पार्टी सभापति रवि लामिछानेले असार ३ गते मधेसबाट प्रतिनिधित्व गर्ने सांसदहरू र नेताहरूसँग छलफल गरेका थिए । मधेसका विवाद मिलाएर आफ्नै पहलमा अधिवेशन गराउने आश्वासन दिएका कारण विवाद मत्थर भएको थियो ।
‘यहाँ अधिवेशन गराउन निकै कठिन छ । संस्थापक नेताहरू र संघीय सांसदहरूको ठाडो हस्तक्षेप छ । सक्रिय जातीय समूह र नेतृत्वको सङ्कीर्णताका कारण दसैँ अगाडि अधिवेशन हुन्छ जस्तो मलाई लाग्दैन’, ती नेताले भने ।
रास्वपाले मधेस बाहेक अन्य ६ वटा प्रदेशमा अधिवेशन सम्पन्न गरिसकेको छ । असार ७ देखि १२ गतेसम्म प्रथम केन्द्रीय महाधिवेशन चितवनमा सम्पन्न भएको थियो ।
