काठमाडौँ । राष्ट्रिय स्वतन्त्र पार्टी (रास्वपा) को सुदूरपश्चिम प्रदेश अधिवेशन तयारी अन्तिम चरणमा छ । असार १ गते धनगढीमा हुने सुरु हुने प्रथम प्रदेश अधिवेशनमा करिब सात÷आठ सय प्रतिनिधि सहभागी हुने महामन्त्री सन्तोषराज जैसीले जानकारी दिए ।
जैसीका अनुसार सकेसम्म सर्वसम्मत नभए निर्वाचन प्रक्रियाबाट नेतृत्व छनोट गर्ने बताए । पालिका र जिल्ला अधिवेशन शान्तिपूर्ण रूपमा सफल भएको जिकिर गर्दै उनले प्रदेश अधिवेशन पनि शान्तिपूर्ण रूपमा नै सम्पन्न हुने विश्वास व्यक्त गरे ।
‘पालिका र जिल्ला अधिवेशन अन्य प्रदेशको तुलनामा यहाँ शान्तिपूर्ण रूपमा सम्पन्न भयो । सबै जिल्ला अधिवेशन र ८८ वटा पालिकामध्ये ८५ पालिकामा अधिवेशन सम्पन्न भएको छ । त्यही अनुसार प्रदेश अधिवेशन सम्पन्न गर्नका लागि तयारी तीव्र बनाइएको छ । उद्घाटन सत्रमा सहभागी हुनका लागि केन्द्रलाई बेलुकासम्म चिठ्ठी पठाउँछौँ’, जैसीले भने ।
नयाँ नेतृत्वको लागि अहिलेसम्म कुनै छलफल नभएको उनले जिकिर गरे । यद्यपि आफू महामन्त्रीमै दोहोरिएर सङ्गठनलाई थप मजबुद बनाउने चाहेको बताए । सभापति पदमा अहिलेसम्म वर्तमान सभापति ई.प्रकाश विष्ट आकाङ्क्षी देखिएका छन् ।
अधिवेशनबाट एक सभापति, एक उपसभापति, एक महामन्त्री, दुई सहमहामन्त्री (फरक लिङ्गको प्रतिनिधित्व हुनेगरी), एक कोषाध्यक्ष, एक प्रवक्ता सहित ४३ सदस्यीय प्रदेश समिति निर्वाचित हुनेछ ।
